Samfylkingin á útsölu – Framámaður í VG hæðist að kollegum á vinstri vængnum
„Uhh… er félagsgjaldið í Samfylkingunni í alvörunni 3.990? Meira að segja upphæðin er leim.“ Þetta skrifar Stefán Pálsson, sagnfræðingur og áhrifamaður í Vinstri grænum, á Facbook-síðu sína og gerir stólpagrín að kollegum sínum á vinstrivæng stjórnmálanna. Tilefnið er frétt Fréttablaðsins um félagsgjöld í stjórnmálaflokkum.
Á Vísindavef Háskóla Íslands er útskýrt að verðlagning undir rúnnaðri tölu, 3.990 í stað 4.000 í þessu tilviki, sé svokölluð sálræn verðlagning. Rannsóknir sýni að í huga neytenda virki vara sem verðlögð er undir rúnnaðri tölu mun ódýrari en sú sem er rúnnuð upp í hærri, slétta tölu. Þá megi einnig vera að neytendur tengi lægri verðin frekar við tilboð eða útsölu og séu líklegri til að kaupa vöru sem sé verðlögð á þann hátt. Stefáni finnst augljóslega kúnstugt að ekki séu hreinlega rukkaðar 4.000 krónur en bætir því við að mun svalara hefði þá verið að rukka félagsgjöld upp á 4.001 krónu.
Skens Stefáns fer misvel í fólk og augljóst að ekki hafa allir húmor fyrir því. Þannig skrifar Guðrún Jóna Jónsdóttir, fyrrverandi formaður ungliðahreyfingar Samfylkingarinnar, eftirfarandi athugasemd á vegg Stefáns: „Hahaa já djöfull er erfitt að vera stjórnmálaflokkur – jiminn vildi að allir stjórnmálaflokkar væru jafn ógó cool og þið; sjiii hvað lífið væri þá gott.“