Hjálparsamtökin Solaris létu synjun Útlendingastofnunar ekki stöðva sig og færðu hælisleitendum í Víðinesi afþreyingarefni eftir söfnun
„Þetta snýst um að gera líf þessara einstaklinga aðeins betra og skemmtilegra,“ segir Sema Erla Serdar, formaður Solaris – hjálparsamtaka fyrir hælisleitendur og flóttafólk á Íslandi sem létu synjun Útlendingastofnunar ekki stöðva sig og færðu íbúum í Víðinesi bílfarma fulla af afþreyingarefni á þriðjudag. Samtökin hófu söfnun fyrir íbúana þann 11. apríl síðastliðinn og stóð hún yfir í viku. Viðbrögð fólks við neyð íbúanna voru vonum framar og færðu Solaris-liðar þakklátum íbúum gjafirnar í óvæntri heimsókn í vikunni.
Meðal þess fólk lét af hendi rakna til söfnunarinnar var sjónvarp, myndlykill, útvarpstæki, DVD-spilari og ótal diskar, leikjatölva, rúmlega hundrað bækur á ensku og frönsku, púsl og borðspil svo eitthvað sé nefnt.
Tilefnið var að undir lok síðasta árs fengu samtökin fregnir af því að litla sem enga afþreyingu væri að finna í húsinu fyrir hátt í sjötíu íbúa Víðiness. Sema segir að í kjölfarið hafi samtökin óskað eftir leyfi frá Útlendingastofnun til að heimsækja heimilið og taka út aðstæður til að sjá hvað vantaði svo hægt væri að bregðast við því.
„Við biðum í nokkrar vikur eftir svari sem síðan var neikvætt. Það eru reglur sem Útlendingastofnun hefur sett um að sjálfboðaliðasamtökum sé bannað að fara inn í úrræði hælisleitenda. Annars staðar höfum við getað bankað upp á og farið inn en þarna er öryggisgæsla.“
Ekkert varð því af heimsókn Solaris-liða fyrr en Semu bárust myndir frá Víðinesi fyrir páska.
„Þar sást að húsnæðið var bókstaflega tómt. Ég held að það hafi verið eitt taflborð og léleg nettenging fyrir sjötíu einstaklinga. Þegar ég sá þessar myndir sá ég að við yrðum að gera eitthvað, svo við settum af stað þessa söfnun og óskuðum eftir alls konar afþreyingu. Þetta er ekki í fyrsta skipti sem við söfnum og eins og áður voru viðbrögðin ótrúleg.“
Á rúmri viku safnaðist mikið magn afþreyingarefnis sem síðan var farið í gegnum og það flokkað. Loks var farið með vistirnar út í Víðines á þriðjudag, án þess að boð væri gert á undan.
Eins og sjá má á meðfylgjandi myndum voru íbúarnir afar þakklátir og aðstoðuðu sjálfboðaliðana við að bera herlegheitin inn í hús. „Þeir þökkuðu fyrir sig ítrekað og sögðu: Þú veist ekki hvað þetta þýðir fyrir okkur,“ segir Sema og bætir við að það sé nógu slæmt fyrir íbúana að vera svo langt í burtu frá öllu með tilheyrandi einangrun, en að geta ekki ekki einu sinni gripið í spil, lesið bók eða horft á sjónvarpið sér til dægrastyttingar væri hræðilegt.
„Þess ber að geta að allir tóku vel á móti okkur, bæði íbúar augljóslega og öryggisverðir, þannig að allt gekk að óskum.“
Sema segir að næst langi samtökin að útvega íbúum, sem allt eru karlmenn og strákar, fótboltamörk til að setja á lítinn grasblett sem er við húsið. Þeir séu margir miklir áhugamenn um fótbolta og leggi einhverjir strákanna á sig langt ferðalag til að komast á knattspyrnuæfingar. Solaris hjálparsamtökin vilja koma á framfæri þakklæti til allra sem lögðu verkefninu lið og segja að framlag allra hafi skipt miklu máli.