Þrjár sýkingar á skömmum tíma í New York – Heilbrigðisyfirvöld uggandi
Rottugangur er alþekkt vandamál í New York. Sé leitað í fréttavef DV þá eru fjölmargar fréttir sem tengjast rottum í borginni. Meðal annars frétt af eins metra löngu gambísku pokarottunni sem húsvörðurinn Jose Rivera drap með heykvísl fyrir nokkrum árum sem og frétt af pítsu-rottunni sem hlaut heimsfrægð fyrir dugnað sinn og útsjónarsemi.
Undir lok síðasta árs var einnig greint frá verkefni þar sem villikettir borgarinnar öðluðust nýjan tilgang við að halda rottum í skefjum. Greinilega var þörf á slíku verkefni.
Nýjustu fregnir herma að þrír íbúar New York hafi sýkst af svokallaðri mjógyrmasýki (e. Leptospirosis) sem er alvarlegur smitsjúkdómur. Svo alvarlegur að einn þeirra sýktu lét lífið. Sjúkdómurinn smitast ekki manna á milli en hann berst frá nagdýrum í menn. Talið er að þeir sem sýktust hafi með einhverjum hætti komist í snertingu við þvag úr rottunum.
Öll þrjú tilvikin áttu sér stað í Bronx-hverfi borgarinnar en undanfarinn áratug hafa 26 tilvik sem þessi skotið upp kollinum. Þrjú tilvik á aðeins tveimur mánuðum vekur hinsvegar upp ugg hjá borgarbúum. Tvö tilvikanna áttu sér stað í desember en hið þriðja núna í febrúar. Meðgöngutími smitsins er ein til tvær vikur en afleiðingarnar eru oft þær að bakteríurnar berast í blóðið og fara þaðan í lifur og nýru hins smitaða. Það var nákvæmlega það sem gerðist í Bronx.
Heilbrigðiseftirlit New York-borgar er með málið á sínu borði og skoðar mögulegar aðgerðir. Fyrst um sinn verða íbúar upplýstir um hættuna og reynt verður að hvetja til hreinlætis, sérstaklega þegar borgarbúar ganga frá heimilissorpinu en þar halda rotturnar sig helst.