Árni Johnsen, fyrrverandi Alþingismaður Sjálfstæðisflokksins býður einbýlishús sitt við Elliðárdal á sölu. Um er að ræða 350 fermetra eign frá árinu 1979 en kaupverðið er tæpar 95 milljónir.
Í auglýsingu á fasteignavef mbl sem skráð var á vefinn í nóvember síðastliðnum, kemur fram að að húsið sé á tveimur hæðum og standi á „frábærum útsýnisstað við Elliðaárdalinn.“ Á efri hæð hússins eru forstofa, mjög stórar þrjár samliggjandi stofur, tvö rúmgóð herbergi, baðherbergi og eldhús og á neðri hæð hússins eru hol, hjónaherbergi, baðherbergi, þvottaherbergi, geymsla, stórt fjölskyldurými.
Þá er einnig 90 fermetra, þriggja herbergja íbúð með sér inngangi á neðri hæð hússins en fram kemur í auglýsingu að auðvelt sé að sameina íbúðina og húsið.
Umrætt hús Árna hefur áður verið auglýst til sölu árið 2014. Þá vakti athygli að húsið væri skráð í Fasteignaskrá um 100 fermetrum minna en það er í raun og veru, en í skránni var ekki getið til um íbúðina á neðri hæðinni. Fram kom að sonur Árna hefði búið í íbúðinni, sem væri ósamþykkt.
„Ég veit ekkert um þetta. Mér skilst að þetta sé algengt,“ sagði Árni í samtali við Vísi á sínum tíma, aðspurður hvort það stangaðist ekki á við lög að skrá eign minni en hún er í raun og veru. Hægt er að spara talsverðar fjárhæðir með því að vera með með ósamþykkta íbúð, sem er ekki inni í fasteignamati hússins, en fasteigangjöld af 90 fermetra eign eru rúmlega 75 þúsund krónur á ári.
Í fasteignaauglýsingunni kemur einnig fram að ufirbyggð steypt bomanite verönd er á milli húss og bílskúrs, skjólsæl og með hitalögnum. Steypt bomanite stétt fyrir framan húsið með hitalögnum undir.
