„Samband mitt og Arnars var gott, allt var gott. Við elskuðum hvort annað heitt og ætluðum að gifta okkur á næsta ári,“ segir Heiðdís Helga Aðalsteinsdóttir, unnusta Arnars Jónssonar Aspar sem lést þann 7. Júní síðastliðinn eftir hrottalega líkamsárás á Æsustöðum.

Í helgarblaði DV er fjallað ítarlega um málið og meðal annars rætt við Aðalstein Elíasson, tengdaföður Arnars um málið, en hann er ósáttur við margt í meðförum þess fyrir dómi. Hann bendir á að fjögurra til fimm ára fangelsisdómur, eins og ákæruvaldið fer fram á gegn Sveini Gesti Tryggvasyni, sé of vægt.

Þá er rætt stuttlega við Heiðdísi um Arnar, en þau höfðu verið saman í tæpt eitt og hálft ár þegar árásin var framin og voru nýbúin að eignast heilbrigða stúlku þegar Arnar lést.

„Arnar var góður faðir. Hann var umhyggjusamur og hlýr. Mér leið alltaf vel með honum og hann veitti mér öryggi. Hann var minn klettur og studdi mig í hverju sem var. Hann var skilningsríkur og hvetjandi. Hann var ákveðinn og þrjóskur. Hann var minn.“