„Annar mannanna sem var stunginn með hnífi á Austurvelli um síðustu helgi er látinn. Karlmaður á þrítugsaldri situr í gæsluvarðhaldi grunaður um verknaðinn, en rannsókn málsins miðar vel.“

Þetta kemur fram í skeyti frá lögreglu.

„Hinn maðurinn, sem var stunginn með hnífi á sama stað og var sömuleiðis fluttur slasaður á bráðamóttökuna, hefur verið verið útskrifaður af Landspítalanum.“

DV fjallaði um málið í dag en þar sagði:

Maðurinn liggur undir grun um að hafa stungið tvo menn sem báðir eru frá Albaníu. Annar þeirra var stunginn ítrekað og meðal annars hitti ein hnífsstungan hann í hjartastað. Sá sem er grunaður um árásina er 24 ára gamall. Að öllu óbreyttu verður hann í gæsluvarðhaldi til 15. desember. Hann flúði af vettvangi eftir árásina en var handtekinn í Garðabæ skömmu síðar. Maðurinn hefur búið hjá ömmu sinni og afa undanfarið en þau eru búsett í sveitarfélaginu. Þegar hinn meinti árásarmaður var handtekinn var hann undir áhrifum vímuefna og reyndist ógerlegt að yfirheyra hann fyrr en daginn eftir. Þá voru vitni að árásinni og hafa þau verið yfirheyrð af lögreglu. Rannsókn málsins heldur áfram.

Samkvæmt heimildum DV komu hinir voveiflegu atburðir fjölskyldu mannsins í opna skjöldu. Hann hefur ekki áður komist í kast við lögin og hefur aldrei sýnt af sér ofbeldisfulla hegðun.

„Þetta er góður drengur. Fjölskyldan er í áfalli, þetta er algjör harmleikur,“ segir aðstandandi mannsins í samtali við DV. Ástvinir mannsins hafa litlar upplýsingar fengið frá lögreglu um hvað gekk á.