Michael Neu, 67 ára karlmaður frá Louisiana í Bandaríkjunum, var handtekinn á dögunum, átján mánuðum eftir að rannsókn lögreglu á umsvifamiklu fjársvikamáli hófst vestanhafs.
Málið varðar fjársvik og er lýsingin kunnugleg; Neu þóttist vera nígerískur prins sem þurfti á aðstoð að halda. Gegn því að fá bankaupplýsingar og aðrar persónuupplýsingar sendar lofaði Neu gulli og grænum skógum í staðinn, ríkulegum arfi og fleiri milljónum króna.
Þetta var þó ekkert annað en dæmigert Nígeríusvindl og er Neu grunaður um að hafa haft fjármuni að fleiri tugum einstaklinga. Er kæran gegn honum í 269 liðum sem sýnir hversu umfangsmikið málið er.
Neu er talinn hafa verið milligöngumaður fyrir glæpahring í Nígeríu og hafði hann því hlutverki að gegna að taka á móti peningum og senda þá svo áfram. Svindlið fór þannig fram að sendir voru tölvupóstar í þúsundavís til fólks þar sem „nígeríski prinsinn“ lýsti raunum sínum. Yfirgnæfandi meirihluti fólks áttar sig á því að um svindl er að ræða á meðan aðrir bjóða fram aðstoð sína í von um skjótfenginn gróða.
Fulltrúi lögreglunnar í Slidell, sem fór með rannsókn málsins, segir að Bandaríkjamenn tapi milljónum dala á ári hverju í svindlum sem þessum. Er fólk hvatt til að fara gætilega á netinu og láta aldrei bankaupplýsingar eða aðrar persónulegar upplýsingar af hendi þegar tölvupóstar sem þessir berast. Vakni minnsti grunur um svik getur raunin verið sú að um svindl er að ræða.
„Ef eitthvað hljómar of gott til að vera satt, þá er það líklega ekki satt,“ segir Randy Fandal hjá lögreglunni í Slidell. „Aldrei láta persónulegar upplýsingar frá þér í gegnum síma eða tölvupóst og aldrei millifæra stórar upphæðir til einhvers sem þú þekkir ekki. Í 99,9 prósentum tilvika er um svindl að ræða.“