Kynferðisleg áreitni hefur mikið verið til umræðu í samfélaginu undanfarið og virðist full þörf á. Einhverjir gætu ályktað að kona ætti að geta auglýst bílinn sinn til sölu á internetinu án þess að verða fyrir kynferðislegri áreitni, en svo virðist ekki vera, a.m.k. ekki í tilfelli Hildar Maríu Hjaltalín Jónsdóttur, sem auglýsti Yaris-bíl sinn til sölu.
Eftir að bíllinn var seldur setti ungur maður sig í samband við Hildi á Messenger-spjallforritinu og falaðist eftir bílnum. Hildur sagði honum að bíllinn væri seldur. Maðurinn brást ókvæða við þessum upplýsingum og hreytti fúkyrðum í Hildi. Hann sendi henni síðan mynd af getnaðarlimi sínum, mynd af sæði og saur – auk fleiri ókvæðisorða.
Hildur birti samskipti sín við manninn á Facebook-síðu sinni. Stuttu síðar gerði maðurinn aðgang sinn óvirkan eða blokkaði Hildi en skjáskot af framferði hans blasa við þeim sem fara inn á síðu Hildar.
Í spjalli við DV segist Hildur oft hafa orðið fyrir kynferðislegri áreitni eins og svo margar kynsystur hennar enda hafi hún lengi unnið á bar og við önnur þjónustustörf. Þetta atvik sé hins vegar óvenjulegt:
„Ég unnið við ýmis þjónustustörf, vann á bar í mörg ár og sem þjónn. Hef lent í ótrúlegustu hlutum. Samt er þetta nú alveg á topp 10,“ segir Hildur sem telur manninn hafa verið að leita að einhverjum til að áreita: „Því hér eru engar kringumstæður sem gætu bent til þess að ég hefði áhuga. Við förum úr „hann er seldur“ yfir í typpamynd á núll einni. Minnsta höfnun og ég er dræsa.“
Hildur tekur þessu með jafnaðargeði: „Ég hef bara rosaþykkan skráp eftir margar uppákomur og fer ekki alveg í mínus.“
Hún segir hins vegar gremjulegt að geta ekki selt bílinn sinn án þess að lenda í áreiti: „Það ætti ekki að þurfa að vera svoleiðis, ég ætti ekki að þurfa að biðja manninn minn um að selja bílinn okkar svo ég lendi ekki í áreiti.“
„Þetta er eitt dæmi af mörgum um að #metoo byltingin er þörf,“ sagði Hildur að lokum.
