„Ég bíð bara ennþá milli vonar og ótta. Þetta er talsvert tekjutap, ætli ég sé ekki búinn að tapa um 250 þúsund krónum á þessu. Ég er að tapa einhverjum þúsundköllum bara á meðan ég tala við þig,“ segir fjölmiðlamaðurinn Eiríkur Jónsson í samtali við DV.

Fréttasíða Eiríks, eirikurjonsson.is, var ein af fjölmörgum síðum sem þurrkuðust út í alvarlegri kerfisbilun hýsingarfyrirtækisins 1984 ehf. í síðustu viku. Var biluninni lýst sem „algjöru kerfishruni“ af forsvarsmönnum félagsins og hefur úrval sérfræðinga, þar á meðal alþingismennirnir Smári McCarthy og Helgi Hrafn Gunnarsson, lagt nótt við dag í tilraun til að bjarga því sem bjargað verður. Ekkert bólar hins vegar á fréttasíðu Eiríks og hann ætlar ekki að bíða með hendur í skauti.

„Ég er með mann í því að búa til nýjan vef og hann ætti að fara í loftið fljótlega. Það er auðvitað kostnaður og mikið vesen, að þurfa að byrja svona upp á nýtt,“ segir Eiríkur. Hann er þó ekki búinn að glata þeirri von að síðan hans komi upp á yfirborðið. „Þeir reikna með að hún sé þarna. Ég sá að vefur Jónasar Kristjánssonar og kvikmyndavefurinn Klapptré voru að detta inn og því aldrei að vita nema að ég sé næstur. Það getur samt enginn sagt mér hvort eða hvenær það gerist. En það eina sem er ljóst er að Eiríkur Jónsson mun snúa aftur,“ segir Eiríkur.

Þá furðar hann sig á viðbrögðum hýsingarfyrirtækisins varðandi mögulegar skaðabætur. „Ég spurði framkvæmdastjórann hvort fyrirtækið væri ekki tryggt fyrir slysum sem þessum. Hann svaraði því til að það væri engin trygging til því að þetta væru náttúruhamfarir,“ segir Eiríkur.