Íbúar Chicago fengu í gær þau tíðindi að 600 manns hafi nú verið myrtir í borginni það sem af er ári. Þetta er annað árið í röð sem fjöldi morða fer yfir 600 á einu og sama árinu og í þriðja sinn frá árinu 2003.
Á undanförnum árum hefur morðum og ofbeldisglæpum fjölgað mjög í þessari þriðju fjölmennustu borg Bandaríkjanna.
Á mánudag höfðu 609 manns verið myrtir árið 2017 í borginni, en á sama tíma á síðasta ári var fjöldinn rúmlega 700. Árið 2015 var fjöldinn 443 og árið 2014 höfðu 400 manns verið myrtir. Á þessum tölum sést að þó morðum hafi fækkað umtalsvert frá því á síðasta ári eru þau enn mjög mörg sé miðað við árin 2014 og 2015.
Skotárásir eru tíðar í borginni og það sem af er þessu ári hafa 3.267 verið skotnir í Chicago. Á sama tímabili á síðasta ári var fjöldinn 3.937. Árið 2015 höfðu 2.288 verið skotnir og árið 2014 höfðu 1.999 verið skotnir.