Efnahagsstjóri ESB segir að ríkt fólk sem borgar ekki skatta séu eins og vampírur

Skattaskjól verði sett á svartan lista

Pierre Moscovici, efnahagsmálastjóri Evrópusambandsins, segir að ríkir einstaklingar, sem reyna eftir fremsta megni að koma peningum sínum í skjól til að greiða lægri skatta, séu eins og vampírur.

Vísar Pierre þarna í upplýsingar sem koma fram í Paradísarskjölunum sem litu dagsins ljós á dögunum.

Pierre bendir á að ríki heimsins þurfi að taka fastar á málum sem þessum enda sé staðreyndin sú að í mjög mörgum tilfellum séu menn að fara að lögum og í þeim skilningi ekki að gera neitt rangt.

Styður hann hugmyndir þess efnis að svonefnd skattaskjól verði sett á svartan lista og þau beitt efnahagsþvingunum. Þá verði sett lög með það að marki að auka gagnsæi. Ef fer sem horfir gætu þessar breytingar litið dagsins ljós á næsta ári.

Pierre sagði á Evrópuþinginu í Strasbourg að Evrópusambandið þyrfti að bregðast við og eitt þeirra vopna sem sambandið gæti beitt væri aukið gagnsæi. „Það mun gera okkur kleift að svipta hulunni af leyndinni,“ sagði hann og bætti við að fólk, sem stundaði það að geyma peninga í skattaskjólum, væru eins og vampírur.

„Það virðist ekki óttast neitt nema ljósið, svo það er undir okkur komið að varpa ljósi á það,“ sagði hann.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.