Norðmenn og Bretar óánægðustu ferðamennirnir seinasta sumar
Ferðamenn sem sækja Ísland heim eru óánægðari með ferðina í sumar miðað við sumarið á undan. Ánægðastir voru Rússar en óánægðastur voru Norðmenn og Bretar.
Í tilkynngu frá frá Gallup kemur fram að hinn svokallaði ferðamannapúls efur lækkað marktækt á milli sumra en hann mælir heildaránægju og heildarupplifun ferðamanna á heimsókn þeirra til Íslands. Ferðamannapúlsinn var 2,5 stigum lægri fyrir sumarið 2017 heldur en sumarið 2016.
Ferðamannapúlsinn hefur til ágúst 2017 mælst lægri í öllum mánuðum ársins 2017 miðað við sömu mánuði síðasta árs. Í ágúst var munurinn ómarktækur og mældist töluvert minni en á fyrri mánuðum ársins þar sem munurinn var í öllum tilfellum yfir 2 stig.
Rússneskir ferðamenn voru ánægðastir með heimsókn sína til landsins í sumar en þar mældist púlsinn 87 stig. Þeir mælast nokkuð hærri en ítalskir ferðamenn sem fylgja næst á eftir með 84,32 stig. Á hinn endann mældist Ferðamannapúlsinn lægstur meðal Norðmanna eða 79,8 stig og Breta þar sem 80,2 stig mældust. Þetta eru jafnframt þeir ferðamannahópar sem hafa lækkað mest frá sama tíma í fyrra. Ferðamannapúlsinn lækkaði um 6,5 stig meðal norskra ferðamanna milli sumra og lækkaði um meira en 4 stig meðal breskra, pólskra og sænskra ferðamanna.
Fram kemur að þegar horft er í undirþætti Ferðamannapúlsins stafi lækkunin milli sumra fyrst og fremst af minnkandi ánægju með verðlag, sem mældist 4,5 stigum minni heldur en sumarið 2016.
Aðrir undirþættir Ferðamannapúlsins lækkuðu einnig frá sumrinu 2016 til sumarsins 2017. Líkur á að mæla með Íslandi sem ferðamannastað minnkuðu um 2,7 stig en hvað varðar heildaránægju ferðamanna, mati þeirra á gestrisni Íslendinga og að hversu miklu leyti væntingar ferðamanna fyrir ferðina voru uppfylltar var lækkunin undir 2 stigum.