Bjarni Benediktsson forsætisráðherra minntist Birnu Brjánsdóttur undir lok fyrstu stefnuræðu sinnar sem hann hélt á Alþingi í kvöld. Vottaði hann fjölskyldu Birnu samúð sína.

Þá kom Bjarni jafnframt á framfæri þökkum til allra þeirra sem komu að leitinni að Birnu. Hann sagði þennan hörmungaratburð hafa dregið fram einstakan samhug og hlýju hjá Íslendingum.

„Ég get ekki látið hjá líða að minnast með miklu þakklæti á þrotlaust starf lögreglu, björgunarsveita og landhelgisgæslu undanfarna daga við leit og rannsókn á máli Birnu Brjánsdóttur. Með hjálp fjölmiðla höfum fylgst með þrautþjálfuðu fólki leggja nótt við dag til að upplýsa þetta átakanlega mál sem hefur hreyft við okkur öllum.

Í sorginni yfir að sjá svo sviplega á bak ungri konu í blóma lífsins hefur verið huggun í þeim samhug og samstöðu sem þjóðin hefur sýnt, í viðbrögðum almennings sem hefur leitað Birnu, veitt upplýsingar og sýnt foreldrum hennar og ástvinum hlýju og stuðning.“