Grænlenska togaranum Polar Nanoq sem lagði af stað frá Hafnarfjarðarhöfn á laugardagskvöld var snúið við í kvöld. Ekki er talið að skipið verði komið til landsins fyrr en seint annað kvöld. Þetta kom fram í fréttum RÚV nú klukkan 22 í kvöld.
Mbl.is greindi frá því í kvöld – og hafði eftir stjórnarmanni fyrirtækisins Polar Seafood, sem á togarann, að skipverjar hefðu fengið beiðni þess efnis að snúa skipinu við.
Þá greindi Morgunblaðið frá því að þyrla Landhelgisgæslunnar væri á leið með íslenska lögreglumenn að skipinu, en það hefur ekki fengist staðfest.
Eins og DV greindi frá í dag voru sjómenn á grænlenska skipinu með rauðan Kia Rio-bíl á leigu sem sóttur var af tæknideild lögreglu í Hlíðasmára í dag. Bílnum var skilað á bílaleiguna á laugardag, sama dag og Birna hvarf, en skipið lagði svo af stað frá Hafnarfjarðarhöfn á laugardagskvöld.
Vísir greindi svo frá því í kvöld að lögreglan hefði óskað eftir aðstoð danska herskipsins Tríton vegna rannsóknarinnar. Það staðfesti Erik Boettger, upplýsingafulltrúi danska hersins.