Dr. Martens-skór, áþekkir þeim sem Birna Brjánsdóttir klæddist nóttina sem hún hvarf, fundust við Hafnarfjarðarhöfn í gærkvöldi. Lögregla og björgunarsveitir hafa leitað í nótt í og við Hafnarfjarðarhöfn en það voru sjálfboðaliðar sem fundu skóna á tólfta tímanum í gærkvöld.
„Tæknideildin kom hingað og tók skóna. Svo þarf að sannreyna hvort þeir séu skórnir hennar en þangað til erum við að vinna okkur tíma,“ sagði Ágúst Svansson, aðalvarðstjóri hjá lögreglunni á höfuðborgarsvæðinu, í samtali við RÚV í nótt. Björgunarsveitir voru boðaðar út eftir að skórnir fundust til að leita, en drónar, björgunarsveitarhundur og lögregla leituðu einnig.
Eins og DV.is greindi frá í gærkvöldi voru misvísandi fréttir um það hvar skórinn hafði fundist. Fyrst var talið að hann hefði fundist í Kaldárseli og héldu fjölmargir sjálfboðaliðar út í kjölfarið til leitar. Lögregla bað fólk að halda kyrru fyrir.
Í frétt RÚV í morgun sagði Ágúst að kafarar bíði átekta en þeir séu ekki komnir á svæðið. Ágúst sagði að ekki væri vitað hvort skórnir sem fundust væru þeir sem Birna klæddist. Fréttamaður benti Ágústi á að snjór hefði verið undir sólanum á skónum sem fundust, en enginn snjór var aðfaranótt laugardags þegar Birna hvarf. Ágúst sagði að lögregla væri að skoða allar vísbendingar um það hvort þetta væru skórnir hennar eða ekki. Engar frekari vísbendingar en umræddir skór hafa fundist á vettvangi.
Mbl.is greindi frá því í morgunsárið að allt tiltækt lið björgunarsveita, lögreglu og Landhelgisgæslunnar verði kallað út til leitar þegar fer að birta. Búið er að fínkemba núverandi leitarsvæði án árangurs.