„Það eru tæplega sjötíu manns sem koma að leitinni. Það er heldur fleiri í Hafnarfirðinum núna,“ segir Þorsteinn G. Gunnarsson upplýsinga- og kynningafulltrúi Landsbjargar í samtali við DV. Björgunarsveitarmenn eru byrjaðir að leita að Birnu Brjánsdóttur í nágrenni við Flatahraun í Hafnarfirði, en leit að vísbendingum í miðborg Reykjavíkur stendur jafnframt enn yfir.
„Það var kallaður út aukamannskapur um tvö leytið,“ segir Þorsteinn jafnframt en að hans sögn var byrjað að leita á svæðinu með hjálp sporhunds um áttaleytið í gærkvöldi.
Þá segir Þorsteinn að á meðan aðallega sé verið að leita á götum, stígum og portum í miðborginni þá sé öðrum leitaraðferðum beitt í Hafnarfirðinum. Leitað er við Flatahraun en merki barst frá síma Birnu á því svæði rúmlega hálftíma eftir að hún sást á eftirlitsmyndavélum í miðborginni.
„Þyrlan er í þann veginn að fara á loft og mun skanna svæðið við Urriðaholtið, fyrir ofan Reykjanesbrautina og svæðið þar sem fólkið er að leita núna.“
Lögreglan á höfuðborgarsvæðinu hefur boðað til blaðamannafundar vegna leitarinnar kl 17 í dag.