„Það er staðreynd að sameiginlegir sjóðir okkar eru takmarkaðir“
„Hugmyndin um borgaralaun gengur út á það að allir fullorðnir fái opinbera framfærslu óháð því hvort þeir eru í vinnu, jafnvel vel borgandi vinnu, eða hafi aðra framfærslu. Þetta er eitthvað það alvitlausasta sem ég hef heyrt lengi,“ segir Bjarni Benediktsson fjármálaráðherra á Facebook-síðu sinni.
Þar gerir hann hugmynd Pírata um borgaralaun að umtalsefni, en þingflokkurinn lagði í fyrrahaust fram þingsályktunartillögu um skilyrðislausa grunnframfærslu, eða borgaralaun.
Áður hafði Húmanistaflokkurinn, sem bauð fram í kosningunum 2013, gert skilyrðislausa grunnframfærslu að einu af stefnumálum sínum.
Samkvæmt henni verður öllum borgurum landsins veitt skilyrðislaus grunnframfærsla, en markmiðið er að styrkja efnahags- og félagsleg réttindi fólks auk þess að útrýma fátækt.
Bjarna finnst ekki mikið til þessarar hugmyndar koma.
„Það er staðreynd að sameiginlegir sjóðir okkar eru takmarkaðir. Við eigum því að nýta þá til að koma þeim í samfélagi okkar til hjálpar sem eru í raunverulegri þörf fyrir stuðning. Eftir því sem við gerum meira fyrir þá sem ekki þurfa á því að halda er gengið á getu okkar til að gera vel við hina,“ segir Bjarni og bætir við:
„Verði staðan á einhverjum tímapunkti sú, að við höfum stutt myndarlega við þá sem minnst hafa og sinnt öðrum mikilvægum verkefnum, en eigum samt nóg eftir, er augljóst hvað á að gera. Lækka skatta,“ segir hann.