Margir af þekktustu tónlistarmönnum Íslands hyggjast koma fram á tónleikum til styrktar leikaranum ástsæla Stefáni Karli Stefánssyni þann 3.október næstkomandi, en Stefán Karl glímir um þessar mundir við alvarleg veikindi.
Líkt og DV greindi frá á dögunum var Stefán Karl nýlega lagður inn á sjúkrahús vegna meins sem veldur þrengingum í gallvegi og brisgöngum og mun hann gangast undir skurðaðgerð þann 4. október næstkomandi þar sem meinið verður fjarlægt.
Segir eiginkona hans. Steinunn Ólína Þorsteinsdóttir í færslu á fésbókarsíðu sinni að aðgerðin sem hann muni undirgangast sé flókin og vandasöm og að eftir hana taki við langt bataferli og lyfjameðferð ef þörf krefur.
Í tilkynningu á heimasíðu Þjóðleikhússins kemur eftirfarandi fram:
„Okkar ástsæli og dýrmæti leikari, Stefán Karl Stefánsson, glímir nú við erfið veikindi sem kalla á kostnaðarsamar aðgerðir og meðferðir með tilheyrandi vinnutapi og fjárhagsáhyggjum.
Við, samstarfsfólk hans og vinir, höfum tekið okkur saman um að halda þessa styrktatónleika fyrir hann og fjölskyldu hans.
Stefán Karl er þjóðargersemi og mikilvægt fyrir okkur öll að hann geti áhyggjulaus einbeitt sér að því að ná heilsu á ný.“
Tónleikarnir fara fram þann 3. október næstkomandi á Stóra sviði Þjóðleikhússins og er miðaverð 3500 kr. Leikkonan Edda Björgvinsdóttir verður kynnir kvöldsins en eftirfarandi listamenn koma fram:
Bubbi Morthens
Ný dönsk
Úlfur Úlfur
Salka Sól
Laddi
Gói
Hansa og Selma
Jón Ólafsson
Regína Ósk
Valgeir Guðjónsson
Stuðmenn
