– 800 tölvur gefnar í haust og fyrstu fóru í Tækniskólann
Allir nemar í rafiðngreinum á landinu, samtals um 800 manns, fá gefins spjaldtölvur í haust frá Samtökum rafverktaka (SART) og Rafiðnaðarsambandi Íslands (RSÍ) fyrir hönd allra atvinnurekenda og launþega í rafiðnaði. Þetta kemur fram í tilkynningu frá félögunum.
Segir þar að tilgangur gjafarinnar sé að tryggja að nemarnir geti nýtt sér það mikla úrval af kennsluefni sem sé þegar í boði á rafrænu formi og stuðla að betri námsárangri og fjölgun nemenda í þessum greinum. Mikil vöntun sé á rafiðnaðarmönnum á Íslandi.
„Það er von okkar að með þessum stuðningi sækist nemum í rafiðngreinum námið betur, námsárangur verði betri og nemendum fjölgi en talið er að það vanti um tvö hundruð nýja starfsmenn með rafiðnaðarmenntun á vinnumarkaðinn á ári hverju til að viðhalda þörf markaðarins,“ segir Rúnar Bachmann, formaður stjórnar Menntasjóðs rafiðnaðarins.
„Alls eru þetta 800 spjaldtölvur sem gefnar eru í haust og voru þær fyrstu, um hundrað talsins, afhentar nemendum í Tækniskólanum í Reykjavík í dag. Næstu daga munu svo fulltrúar SART og RSÍ heimsækja alla verkmennta- og fjölbrautaskóla landsins sem kenna rafiðnir og afhenda nemendum í rafiðngreinum spjaldtölvurnar. Nemarnir geta þá skráð sig á námsgagnavefinn www.rafbok.is og fengið aðgang að því mikla úrvali af kennsluefni sem er í boði fyrir grunndeildir rafiðna og þurfa þeir þá ekki að kaupa þær námsbækur,“ segir í tilkynningunni.