Elizabeth Warren vill lög um að forstjórar verði persónulega ábyrgir
„Það er huglaus forysta“
„Þetta mun ekki breytast fyrr en þeir sem ráða verða persónulega gerðir ábyrgðir fyrir gjörðum sínum,“ sagði öldungadeildarþingmaðurinn Elizabeth Warren þegar forstjóri Wells Fargo-bankans, John Stumpf, mætti fyrir bankanefnd öldungadeildarþingsins í gær.
Bandaríska fjármálaeftirlitið hefur sektað Wells Fargo um 185 milljónir bandaríkjadala, 21,1 milljarð króna, fyrir að opna ólöglega reikninga í nafni viðskiptavina sinna til þess að ýkja sölutölur. Um er að ræða hæstu sekt sem eftirlitið hefur lagt á banka. Bankinn mun auk sektarinnar greiða viðskiptavinum fimm milljónir bandaríkjadala til baka.
Starfsmenn bankans opnuðu um tvær milljónir bankareikninga á nafni viðskiptavina án vitundar þeirra. Þeir stofnuðu meðal annars falska aðganga að netbanka fyrirtækisins, með því að búa til gervinetföng í nafni viðskiptavinanna.
Þetta var gert til að ná markmiðum um söluaukningu – sem hafði í för með sér að stjórnendur fengu auknar þóknanir. Bankinn hefur beðist afsökunar á því að hafa látið viðskiptavinunum í hönd vöru sem þeir óskuðu ekki eftir.
Óhætt er að segja að Warren hafi tekið forstjórann í bakaríið, þar sem hann mætti fyrir þingnefndina í gær. Hún sagðist gefa lítið fyrir orð hans en vildi þess í stað fara yfir gjörðir hans. Hún komst að því að hann hefði ekki sagt af sér, hefði ekki rekið einn hátt settan framkvæmdastjóra vegna málsins auk þess að hafa ekki greitt einn eyri til baka af þeim fjármunum sem féllu í vasa hans sjálfs vegna svindlsins.
Þá kom fram að Stumpf hefði ekki rekið Carrie Tolstedt, sem stýrði deildinni sem sá um misgjörðirnar, heldur leyft henni að setjast í helgan stein. Tolstedt er 56 ára gömul. Við það fékk hún 124,6 milljónir dollara í formi hlutabréfa og kauprétta. Raunar svaraði Stumpf því til að honum hefði aldrei hugkvæmst að reka hana. „Það er huglaus forysta,“ sagði Warren.
Hún benti á að óbreyttum gjaldkera sem stæli 20 dollurum biði sennilega kæra fyrir þjófnað á sama tíma og forstjórar á Wall Street þurfi nánast aldrei að axla ábyrgð af nokkru tagi; hvorki árið 2008 þegar þeir hefðu valdið efnahagshruni né núna, ef marka mætti þá staðreynd að Stumpf væri enn í starfi. Hann ætti að segja af sér, skila peningunum sem hann græddi og undirgangast sakamálarannsókn.
Hér fyrir neðan má sjá yfirheyrslu Elizabeth Warren yfir John Stumpf.