Melina og Isabelle birtu athyglisverðar myndir úr ferðinni á Instagram
Tvær kanadískar konur, 22 og 28 ára, hafa verið handteknar eftir að 95 kíló af kókaíni fundust í fórum þeirra. Konurnar, Melina Roberge og Isabelle Lagacé, voru handteknar í Sydney í Ástralíu en þangað höfðu þær komið með skemmtiferðaskipinu Sea Princess.
Málið hefur vakið talsverða athygli enda voru þær Melina og Isabelle afar virkar á samfélagsmiðlinum Instagram þar sem þær birtu myndir úr ferðalaginu. Þær lögðu af stað frá Bretlandi í júnímánuði, sigldu með skipinu til Kanada, Bandaríkjanna, Kólumbíu og Perú meðal annars áður en þær enduðu í Ástralíu þar sem fíkniefnin fundust.
Konurnar voru handteknar ásamt 63 ára karlmanni, Andre Tamine, sem grunaður er um aðild að smyglinu. Ljóst er að þremenningarnir eiga þungan fangelsisdóm yfir höfði sér.
Í umfjöllun Mail Online eru birtar myndir úr ferðalagi stúlknanna. Þar má sjá meðal annars sjá þær drekka úr kókoshnetum og stilla sér upp á glæsilegum ströndum á baðfötunum. Þremenningarnir voru handteknir á sunnudag, en um er að ræða eitt stærsta smygl sinnar tegundar í sögu Ástralíu.
Melina, Isabelle og Andre hafa verið úrskurðuð í gæsluvarðhald til 26. október. Refsiramminn fyrir brot af þessu tagi í Ástralíu er lífstíðarfangelsi.