Foreldrar rúmlega tvítugrar stúlku sem lést eftir að hafa neytt eiturlyfja hafa höfðað mál í kjölfar dauða stúlkunnar. Katie Dix var aðeins tuttugu og eins árs þegar hún lést á síðasta ári í kjölfar þess að hafa tekið inn e-töflu. Stúlkan var á tónlistarhátíð í Los Angeles þegar atvikið varð.

Hún hné niður eftir að hafa tekið inn töflu sem hún taldi vera mollý, eða e-tafla. Samkvæmt stefnunni sem foreldrar hennar hafa höfðað gegn forsvarsmönnum tónlistarhátíðarinnar, Los Angeles-sýslu og borgaryfirvöldum í Paloma, leið hálftími þar til bráðaliðar komu henni til aðstoðar. Þegar á sjúkrahús var komið hafði hún fengið hjartaáfall og var hún úrskurðuð látin skömmu síðar.

Samkvæmt stefnunni voru 60 þúsund manns á hátíðinni, sem ber yfirskriftina Hard Summer Music Festival, og var öryggisgæslu verulega ábótavant. Að mati foreldra hennar hefði verið hægt að bjarga lífi hennar ef starfsfólk hátíðarinnar og sjúkraflutningamenn hefðu komið fyrr á staðinn. Þá kemur fram í stefnunni að þeir sem komu stúlkunni til aðstoðar hafi ekki haft nægjanlega þekkingu á hvernig ætti að meðhöndla hana.

Rannsókn leiddi í ljós að taflan sem Katie tók inn innihélt allskonar kokteil af hættulegum efnum sem leiddu til dauða hennar. Önnur ung stúlka lést á þessari sömu hátíð, en alls voru 49 ungmenni flutt á sjúkrahús eftir að hafa neytt fíkniefna á hátíðinni.