Hafði ráðist á móður sína sem hafði fengið nálgunarbann á son sinn
Þrjátíu og fimm ára karlmaður hefur verið handtekinn vegna gruns um að hafa orðið foreldrum sínum að bana í Sollentuna norður af Stokkhólmi í gærkvöldi. Foreldrar mannsins voru stungnir til bana.
Tilkynnt var um málið á sjöunda tímanum að sænskum tíma í gærkvöldi og þegar lögregla kom á staðinn fannst maður liggjandi í blóði sínu fyrir utan heimili sitt. Inni í húsinu var eiginkona mannsins og var hún með lífsmarki þegar lögregla kom á staðinn. Hún lést á sjúkrahúsi skömmu síðar.
Í frétt sænska blaðsins Expressen kemur fram að móðir mannsins hafi fengið nálgunarbann á son sinn. Nálgunarbannið virðist hafa dugað skammt því áður en að atvikinu í gærkvöldi kom hafði maðurinn brotið gegn því í fimm skipti síðustu mánuði. Foreldrar mannsins voru 75 ára.
Maðurinn var handtekinn í skóglendi, skammt frá heimili foreldra sinna. Hann er nú í haldi lögreglu, grunaður um verknaðinn. Maðurinn á langan afbrotaferil að baki og hafði meðal annars hlotið dóm fyrir að ráðast á móður sína. Í kjölfarið fékk móðirin nálgunarbann á hann en sem fyrr segir hafði hann brotið gegn því í fimm skipti.
Hann er grunaður um að hafa brotist inn á heimili foreldra sinna með því að brjóta rúðu.