Foreldrar hans eru ráðþrota
Óhóflega feitur 10 ára drengur, sem getur ekki lengur klæðst fötum en er þess í stað vafinn inn í dúka sökum stærðar sinnar, er kominn á heilsufæði þar sem mikil hætta er á að hann deyi úr offitu fyrir aldur fram ef ekkert verður að gert.
Arya Permana, sem ber þann vafasama heiður að vera feitasta barn í heimi, er 192 kíló. Hann borðar fimm máltíðir á dag sem samanstanda af hrísgrjónum, fiski, kjöti, grænmetissúpum og Tempeh sem er indónesískur soyja kjötréttur.
Arya sem er frá Vestur-Jövu á Indónesíu getur ekki lengur mætt í skólann sökum þess að hann er hættur að geta gengið. Móðir hans sem er mjög áhyggjufull segir að hann sé krónískt svangur. „Hann hefur mjög mikla matarlyst og gæti auðveldlega borðað á við tvo fullorðna í hverri máltíð.“
Drengurinn er annað barn foreldra sinna en þegar hann kom í heiminn vó hann 3,2 kíló sem er eðlileg fæðingarþyngd.
Hann var þó orðinn nokkuð í stærra lagi um tveggja ára aldur. Foreldra hans grunaði þó ekki að vandamálið ætti aðeins eftir að stækka. Nokkrum árum seinna fitnaði hann skyndilega mjög mikið. Í samtalið við Indónesíska fjölmiðla segir faðir hans að þau hafi í framhaldinu gengið á milli lækna sökum þess hve drengurinn var þungur. Engin gat þó hjálpað þeim og í dag segjast þau vera orðin ráðþrota.
Æðsta ósk móður Arya er að sjá hann fara út að leika sér með öðrum börnum í hverfinu. Þá kveðst faðir hans vera orðinn langþreyttur á ástandinu en þau eru farin að þurfa að fá lánaða peninga hjá vinum og ættingjum til að kaupa mat ofan í drenginn.