Níu ára drengur frá Kaliforníu gerði sér lítið fyrir og synti í miklum straumi og kulda frá San Fransisco að Alcatraz-eyjunni – og aftur til baka. Pilturinn, James Savage, setti heimsmet enda yngsti sundmaðurinn sem hefur lagt þetta á sig.
Þetta var ekki auðvelt, segir James.

Eftir þrjátíu mínútur var hann að því kominn að gefast upp þegar öldugangurinn lamdi hann í framan.
„Ég hélt fyrst að þetta yrði auðvelt, en þegar ég var komin svolítið áleiðis varð þetta mjög þungt og straumurinn sendi mig út og suður,“ segir James.

Faðir hans hafði lofað honum 100 dollurum ef hann kláraði og þegar hann taldi að James væri að gefast upp þá bauð hann 200 dollara. Það virkaði, drengurinn lauk sundinu. Það tók hann aðeins tvær klukkustundir en á milli pósta var ein míla og alls voru þetta því tvær mílur, um 3,2 kílómetrar.

Þegar hann kom að landi gekk hann beint í faðm móður sinnar. Hún sagði við fjölmiðla á staðnum að drengurinn væri vissulega fífldjarfur, en að þau, foreldrarnir, væru afar stoltir.