Foreldrar í Indiana-ríki Bandaríkjanna geta nú skilið börn eftir í sérstökum barnakössum sem komið hefur verið fyrir framan slökkviliðsstöðvar. Um er að ræða kassa sem koma í veg fyrir að börn sem foreldrar vilja ekkert með að hafa verði úti. AP-fréttaveitan greinir frá þessu.

Ríkið samþykkti lög um að koma þessum kössum fyrir í febrúar síðastliðnum og sagði þá Casey Cox, fulltrúi Repúblikanaflokksins, í viðtali að kassarnir væru eðlileg þróun á lögum um heimila foreldrum að skilja börn sín eftir á lögreglustöðvum, slökkviðliðsstöðvum og sjúkrahúsum án eftirmála. Slík lög eru í gildi í öllum ríkjum Bandaríkjanna en engu að síður verða þúsundir barna úti á hverju ári eftir að hafa verið yfirgefin.

Dawn Geras, formaður samtakanna ´Björgum yfirgefnu börnunum‘ í Chicago, sagði í samtali við fréttasíðuna Gawker að um 2.800 börn hafi fundist á löglegum stöðum frá árinu 1999 en 1.400 börn hafi fundist á víðavangi þar sem lífslíkurnar eru hverfandi.

Kassarnir sem Indiana-ríki hefur komið fyrir eru hannaðir af Monicu Kelsey, sjúkraliði sem var sjálf skilin eftir af móður sinni sem hafði verið nauðgað.

Monica hefur mikinn stuðning og hafa góðgerðarsamtök meðal annars greitt fyrir uppsetningu yfir 100 barnakassa en það eru ekki allir jafn ánægðir. Heilbrigðisyfirvöld í Indiana eru mótfallinn kössum af þessu tagi og segja engar rannsóknir liggja fyrir um að börn sem skilin eru eftir í þeim séu öruggar.

Monica segir hins vegar að kerfið geti varla orðið öruggara, kassinn læsist þegar barni er komið fyrir og í kjölfarið sé sent neyðarboð sem tryggi það að starfsmenn geti náð í barnið innan 5 mínútna. Það sé mun öruggara en að treysta á að mæðurnar eða feðurnir þori að skilja barnið eftir þar sem líkurnar séu góðar á það finnst.