Rúmlega 10 prósent Íslendinga fóru í ljósabekk á síðasta ári. Þeim fer þó fækkandi en árið 2004 fóru 30 prósent landsmanna í ljós. Töluvert fleiri konur stunda ljósabekki heldur en karlar. Þær eru oftast á aldrinum 18 til 24 ára.

Þetta kemur fram í nýrri Gallup könnun sem Morgunblaðið greinir frá. Þar segir jafnframt að dæmi séu um að börn, allt niður í 12 ára gömul, stundi ljósabekki í Reykjavík þrátt fyrir að aldurstakmarkið sé 18 ára.

Reykvíkingar fara oftar í ljós en íbúar annarra sveitarfélaga og gildir það sömuleiðis um íbúa með lægstu tekjurnar. Gallup gerði rannsóknina fyrir starfshóp um varnir gegn útfjólubláum geislum, sem hefur látið framkvæma slíkar
rannsóknir frá árinu 2004.

Í hópnum sitja fulltrúar frá Geislavörnum ríkisins, Embætti landlæknis, húðlæknum og Krabbameinsfélaginu. Á þessum 12 árum hefur notkun ungmenna á ljósabekkjum minnkað umtalsvert, frá 38 prósent árið 2004 niður í 25 prósent. Árið 2005 fóru um tveir þriðju stúlkna á aldrinum 18-24 ára í ljós en tíu árum síðar var þetta hlutfall komið niður í 55 prósent.