„Ég er með þetta magn á viku, hvað ætli Elko sé með?“
„Þegar þetta er komið inn í verklag fyrirtækja þá er þetta ekkert mál.“ Þetta segir Gylfi Gylfason eigandi Símabæjar en þar hefur starfsfólk flokkað plast sérstaklega frá öðrum úrgangi síðastliðin 10 ár. Hann segir þetta orðinn fastan vana og með því að vera með aðgengilega aðstöðu nærri starfsmönnum þá sjái þetta um sig sjálft.
Gylfa þykir sömuleiðis undarlegt að flokkun sem þessi sé ekki komin í lög. „Ég er með þetta magn á viku, hvað ætli Elko sé með?“
Á myndinni sem birtist hér að ofan má sjá plastmagnið sem starfsfólk Símabæjar flokkar frá öðru rusli á einni viku. Plastið vegur 3 til 4 kíló sem þýðir að á ársgrundvelli stoppar fyrirtækið um einn gám af plasti frá því að lenda í nokkur hundrað ára ferli niðurbrotnunar hér rétt utan við höfuðborgarsvæðið.
Mikill hluti plastsins eru umbúðir utan af vörum sem fólk kaupir í versluninni. Gylfi segir ákveðna björgun því ekki eru allir að flokka. Hann segir að það skipti þó meira máli að koma í veg fyrir að plastið komi til landsins og sé því ekki framleitt yfirhöfuð.
„Þótt Símabær sé ekki stórt fyrirtæki þá eigum við viðskipti við mjög stóra erlenda birgja sem ég heimsæki árlega. Þeir hlusta á mig því ég stend sjálfur við búðarborðið og veit frá fyrstu hendi hve fólk er að verða meðvitaðra um óþarfa plastmengun.“
Símabær hefur að auki þróað eigin GSM veskjalínu. Með henni hefur Gylfa tekist að minnka plastúrgang fyrirtækisins um 20 til 30 prósent þar sem veskin eru ekki í umbúðum.
„Forsendurnar fyrir hinum nýju umbúðum voru ekki síst þær að um 95 prósent þeirra sem kaupa sér GSM veski skilja pakkninguna eftir, og það var ráðandi við hönnun pakkninga fyrir RealCases.“
Að auki notar fyrirtækir endurnotanlegar pakkningar fyrir smávörur. „Sú aðferð er ekki bara að spara rusl heldur flutning og orkubrennslu við flutning á ruslinu til landsins.“
Gylfi sér mikla möguleika þegar kemur að því að minnka notkun á plasti. „Verslunin í landinu er að flytja inn tonn eftir tonn plastúrgangi og það er nákvæmlega ekkert að því að kaupmenn séu gerðir ábyrgari en nú er.“