Sigmundur Davíð Gunnlaugsson formaður Framsóknarflokksins og fyrrverandi forsætisráðherra lét hafa eftir sér á Sprengisandi á Bylgjunni að ekki liggi á að halda kosningar í haust þrátt fyrir orð Bjarna Benediktssonar fjármálaráðherra og Sigurðar Inga Jóhannsson forsætisráðherra fyrr á árinu. Bjarni Benediktsson segir ekkert hafa breyst. Eyjan fjallaði um málið.

Sigmundur Davíð sagði meðal annars að bagalegt væri að fara í kosningar á sóknartímum.

„Það er rétt að þeir lýstu því yfir að þeir væru reiðubúnir til þess að ræða það að kosningar færu fram snemma, í haust. Ef að, og þeir létu það alltaf fylgja sögunni, ef að öll þau mál sem þyrftu að klárast væru búin. Nú er ég ekki að sjá það gerast fyrir september október, en verði það hins vegar afstaða þingflokkanna, og þá þarf það að afstaða beggja stjórnarflokkanna, að þeir vilji halda kosningar fyrr en ráð var fyrir gert þá að sjálfsögðu verður það niðurstaðan.“

Bjarni Benediktsson sagði á þingi í dag eftir spurninga frá Helga Hjörvar þingmanni Samfylkingarinnar að staðan væri óbreytt.

„Það hefur ekkert breyst varðandi það sem við forsætisráðherra höfum áður sagt, að hér er stefnt að kosningum í haust.“

Þá kvaðst Bjarni vera hissa á að þetta væri dregið í efa þar sem margítrekað hefði verið að kosningar vær fyrirhugaðar með haustinu.

„Sjálfstæðisflokkurinn er þegar farinn að undirbúa kosningar í haust,“ bætti Bjarni við en ítrekaði að stjórnarflokkarnir horfðu til þess að kláru hin stóru mál áður en gengið yrði til kosninga.