Yfirvöld í Norður-Kóreu hafa dæmt bandarískan ríkisborgara, Kim Dong Chul, til tíu ára erfiðisvinnu. Kim, sem er 63 ára, var dæmdur fyrir njósnir og er hann annar bandaríski ríkisborgarinn sem dæmdur er til erfiðisvinnu í landinu á þessu ári.

Kim þessi er fæddur í Suður-Kóreu og er hann sagður, samkvæmt frétt AP, hafa stundað viðskipti í Norður-Kóreu og haft búsetu í Kína og í Bandaríkjunum.

Kim viðurkenndi fyrir framan fjölmiðla í mars síðastliðnum að hafa unnið að því að stela ríkisleyndarmálum og stunda njósnir í Norður-Kóreu fyrir yfirvöld í Suður-Kóreu. Markmiðið hefði verið að grafa undan yfirvöldum í Norður-Kóreu. Allar líkur eru á að Kim hafi ekki átt margra kosta völ þegar hann var leiddur fyrir ríkisfjölmiðla Norður-Kóreu, handritið af blaðamannafundinum hafi verið skrifað fyrirfram. Hann var handtekinn í október síðastliðnum.

Leyniþjónusta Suður-Kóreu hefur þvertekið fyrir að Kim hafi stundað njósnir á þeirra vegum. Eins og greint var frá fyrir skemmstu var ungur Bandaríkjamaður, Otto Warmbier, dæmdur til fimmtán ára erfiðisvinnu í Norður-Kóreu fyrr á árinu.