Svigrúm skapast vegna fækkunar barna
Öll börn fædd í janúar og febrúar á árinu 2015 fá boð um að komast í leikskóla borgarinnar í ágúst. Þetta var ákveðið á fundi borgarráðs í morgun. Í tilkynningu frá borginni kemur fram að með þessu verði þau tímamót að öllum börnum 18 mánaða og eldri býðst leikskólavist frá og með haustinu, en reglur borgarinnar hafa miðast við að börn innritist á leikskóla árið sem þau ná tveggja ára aldri.
Þá segir Reykjavíkurborg í tilkynningu að svigrúm verði til að taka inn fleiri börn nú á haustmánuðum vegna barnafækkunar á milli ára og verða því um 200 börn yngri en tveggja ára innrituð.
„Töluvert var bætt við húsnæði leikskólanna þegar stóru fæðingarárgangarnir frá 2009 og 2010 náðu leikskólaaldri. Því verður aukarými í leikskólum borgarinnar þegar elsti árgangur leikskólabarnanna hefur grunnskólagöngu nú í haust.
Með því að taka inn yngri börn í leikskólana má nýta betur húsnæði, ná jafnvægi í starfsmannahaldi og bæta þjónustu við barnafjölskyldur með ung börn,“ segir í tilkynningunni.
Þá segir að framundan sé vinna innan borgarinnar við að greina tækifæri til að bjóða enn yngri börnum leikskólaþjónustu á komandi árum. „Stefna núverandi meirihluta borgarstjórnar er að brúa bilið milli fæðingarorlofs og leikskóla m.a. með aðkomu ríkisins.“