Fjármálaráðherra situr áfram og neitar að horfast í augu við hneykslið. Hlegið er að þingmálalista ríkisstjórnarinnar um allt land. Þetta sagði helgi Hjörvar, þingflokksformaður Samfylkingarinnar, í morgun. Hann hóf þingfund á að ræða um Panamaskjölin. Eyjan greinir frá málinu. Var nokkur æsingur og töluverður bjöllusláttur þegar þessi mál voru rædd í morgun í þinginu.
Helgi benti á að forsætisráðherra hefði sagt af sér en gagnrýndi að fjármálaráðherra sitji áfram þegar lægra settir menn en Bjarni hefðu sagt af sér.
Bjarni var til svars og sagðist hlakka til að leggja þann „gríðarlega árangur“ sem ríkisstjórnin hefur náð undir kjósendur í þingkosningum í haust, líkt og hann orðaði það. Bætti Bjarni við að ríkisstjórnin hefði ítrekað lýst fyrir stjórnarandstöðuflokkunum hvernig hún ætlaði að vinna og gengið yrði til kosninga í haust.
Þegar svo Róbert Marshall sagði: „Við erum stödd í miðju bílslysi sem sýnt er hægt og hæstvirtur fjármálaráðherra virðist ekki gera sér grein fyrir því að traustið er farið,“ svaraði Bjarni nokkuð hvass að vantrauststillaga hefði verið felld. Bjarni sagði kokhraustur:
„Staðreyndin er sú að stjórnarflokkarnir, þeir hlakka til fundar með kjósendum til þess að leggja fyrir kjósendur í þessu landi þann gríðarlega árangur sem áherslur ríkisstjórnarinnar hafa skilað fyrir landsmenn.“