Bandaríski herinn hefur óskað eftir fjármagni til þess að koma sér upp aðstöðu á gömlu herstöðinni á Keflavíkurflugvelli samkvæmt bandaríska hertímaritinu Stars and Stripes.

Um er að ræða tímabundið eftirlit P-8A Poseidon eftirlitsflugvéla til þess að fylgjast með kafbátaumferð um Atlantshafið.

Herinn hefur nú eftirlit með þessu sama svæði með því að senda flugvélar frá Sikiley á Ítalíu.

Ef marka er frétt fjölmiðilsins, sem er málgagn hersins, þá hefur herinn óskað eftir fjármagni til þess að uppfæra stöðina á Íslandi. Þá segir í greininni að nú sé aðeins áhugi á því að hafa hér tímabundið eftirlit, en það gæti þó breyst.

Eins og kunnugt er þá fór herinn af landi brott árið 2006 eftir að fókus hersins beindist að Mið-Austurlöndum. Nú hefur það breyst með miklum væringum í kringum Rússland.

Ekkert er að finna um málið á heimasíðu utanríkisráðuneytisins.

Í frétt sem RÚV birti í september á síðasta ári kom fram að bandarísk stjórnvöld hafa viðrað þá skoðun við íslensk yfirvöld að í ljósi breytts öryggisumhverfis gæti verið ástæða fyrir Bandaríkjamenn að auka viðveru bandarísks liðsafla hér á landi.

Engar viðræður hefðu þó átt sér stað milli ríkjanna tveggja á þeim tíma.