Evrópuráðið lét nýlega gera viðamikla könnum þar sem íbúar hinna ýmsu borga Evrópu eru spurðir út í hve ánægðir þeir eru með lífið. Nokkra athygli vekur að mesta hamingjan ríkir ekki í stóru heimsborgunum heldur í smærri borgum Evrópu. Þannig er sú borg sem nær hæsta hamingjustuðlinum Álaborg í Danmörku. 72% aðspurðra íbúa í þeirri borg sögðust vera mjög ánægðir með líf sitt og 24% ánægðir.
Kaupmannahöfn er síðan í öðru sæti á listanum og mætti af þessu ráði að því fylgi mikil hamingja að búa í Danmörku . 67% aðspurðra þátttakenda í könnuninni í Kaupmannahöfn sögðust vera mjög ánægðir með lífið.
Reykjavík er síðan í þriðja sæti en þar eru 66% mjög ánægðir og 31% ánægðir.
Zürich í Sviss er í fjórða sæti, Graz í Austurríki í því fimmta, Oslo í Noregi er í sjötta sæti, Malmö í Svíþjóð í sjöunda, München í Þýskalandi er í 8. sæti og hamingjuríkasta þýska borgin á listanum, Vín í Austurríki er í 9. sæti og Newcastle er í 10. sæti og þar með sú borg á Englandi þar sem mest hamigja ríkir.