Flaska brotinn á höfði manns í miðbænum – Slagsmál við Hallgrímskirkju – Fjöldi fólks stöðvað í umferðinni
Mikill erill var hjá lögreglunni á höfuðborgarsvæðinu í nótt og í gærkvöldi. Samkvæmt upplýsingum frá lögreglunni voru um hundrað mál færð til bóka á tólf klukkustunda tímabili, eða frá klukkan 17 til 05. Flest málin tengdust hávaða og ölvun.
Meðal verkefna lögreglunnar í nótt má nefna hópslagsmál í Skeifunni, slagsmál við Hallgrímskirkju og líkamsárás á veitingahúsi í miðbæ Reykavíkur seint í nótt.
Þar braut maður flösku á höfði annars manns. Árásarþoli var í kjölfarið fluttur á slysadeild til aðhlynningar. Árásarmaðurinn var handtekinn og vistaður i fangageymslu fyrir rannsókn máls.
Einn maður var svo handtekinn í Hafnarfirði um þrjú leytið í nótt, grunaður um innbrot og þjófnað í bifreiðar. Maðurinn var í annarlegu ástandi og var vistaður í fangageymslu lögreglu fyrir rannsókn máls. Við vistun fundust ætluð fíkniefni í sokk mannsins.
Að auki stöðvaði lögreglan á höfuðborgarsvæðinu fjölda ökumanna í nótt. Þeir eru flestir grunaðir um akstur undir áhrifum áfengis eða fíkniefna. Þá voru þónokkir stöðvaðir vegna vörslu fíkniefna og fundust ætluð fíkniefni hjá nokkrum sem lögreglan stöðvaði í nótt.