Allt að 150 þúsund mörgæsir eru dauðar eftir að ísjaki á stærð við Lúxemborg lokaði firðinum þeirra á Suðurskautslandinu. Breska dagblaðið Independent greinir frá þessu. Þurftu mörgæsirnar því að ferðast 122 km í leit að fæðu. Þetta kom í ljós við rannsókn loftslagsbreytingahóps háskólans í Nýju Suður-Wales í Ástralíu, hópur mörgæsa sem taldi heil 160 þúsund stykki árið 2011 er kominn niður í 10 þúsund.

Um er að ræða mörgæsasvæði á Denisonhöfða í Samveldisflóa þar sem þessi tiltekni hópur Adelie-mörgæsa hefur haldið til síðastliðna öld. Vísindamenn gera ráð fyrir að mörgæsirnar hverfi alfarið innan 20 ára nema ísjakinn, sem ber heitið B09B, fari burt. „Íbúar Denisonhöfða hverfa innan 20 ára nema B09B færi sig eða ísbreiðan nái að ýta honum burt,“ segir í skýrslu rannsóknarhópsins.