Hefur nýtt líf eftir áralanga fangelsisvist í Bandaríkjunum
„Mér finnst mjög skemmtilegt að geta gert eitthvað sem er alveg nýtt fyrir mér. Nú hef ég bara unnið hér í tvo daga og mér líst mjög vel á,“ segir Geir Gunnarsson sem hefur nú hafið störf hjá íþróttavöruversluninni Sports Direct. Geir sat í tæp 18 ár í öryggisfangelsi í Bandaríkjunum þar sem aðstæðurnar voru skelfilegar en flutti til Íslands eftir að hann losnaði í von að um geta hafið nýtt og betra líf.
Í samtali við Fréttatímann segir Geir að hann hafi verið andvaka aðfararnótt fyrsta vinnudagsins. „Ég vaknaði klukkan þrjú um nóttina, alltof spenntur,“ segir hann en hann vinnur í þjónustudeildinni og var á afgreiðslukassa fyrsta daginn.Þá segist hann hafa gripið til þess ráðs að skella sér í göngutúr um Elliðárdalinn á fimmta tímanum og var svo mættur galvaskur til vinnu um morguninn. Hér má lesa grein Fréttatímans í heild sinni
Þetta er fyrsta starf Geirs eftir að hann lauk afplánun í Greensville-öryggisfangelsinu í Virginíu í Bandaríkjunum í september í fyrra. Hlaut hann 20 ára dóm fyrir hættulega líkamsárás. Er þetta lengst afplánun sem Íslendingur hefur sætt. Í samtali við Kastljós síðasta haust sagðist hann hlakka mjög mikið til að lifa eðlilegu lífi, fá vinnu, eignast húsnæði og kynnast konu eftir að hafa dvalið svo árum skipti í fangelsi þar sem óttaðist allan tímann um líf sitt.