„Ég skipti ekki oft skapi en viðurkenni það fauk hressilega í mig við að lesa þessa frétt í morgun,“ segir Dagur B. Eggertsson, borgarstjóri Reykjavíkur á Facebook-síðu sinni en hann hlekkjar á frétt Fréttablaðsins sem greindi frá því í morgun að ellefu ára gömul stúlka hefði ekki mátt kaupa sér pítsusneið vegna stífra reglugerða.

Sjá einnig: Fékk ekki að kaupa pítsusneið út af stífri reglugerð

Dagur er ómyrkur í máli og skrifar á Facebook: „Svona gerir maður ekki. Það hefur verið skýr sýn og stefna borgarinnar að engum sé vísað úr matarröðinni, hvorki vegna efnahags né annarra ástæðna. Þetta hefur líka ítrekað komið fram í upplýsingum úr skólunum að þannig sé á málum haldið.“

Dagur segir að hann taki þetta mál einnig sérstaklega nærri sér því Fellaskóli hafi verið í stórsókn undanfarin ár, „og ég er mjög stoltur af því starfi og árangri sem starfsfólk og stjórnendur, nemendur og fjölskyldur þeirra hafa skilað,“ segir Dagur.

„Við eigum að skapa samfélag fyrir alla og þar sem allir eru með. Það er sérstaklega mikilvægt í skólunum. Ef þetta er vafamál í einhvers huga þá eigum við að hnykkja á því.“

Dagur lýkur svo pistlinum á þeim orðum að hann hafi óskað í morgun formlega eftir skýringum á þessum fréttum frá Skóla- og frístundasviði.

Fréttirnar hafa einnig vakið mikla reiði á samfélagsmiðlum. Illugi Jökulsson, fjölmiðlamaður, gagnrýnir málið harkalega á Facebook síðu sinni og kallar eftir því að skólastjóranum, Sigurlaugu Hrund Svavarsdóttur, sé veitt áminningu vegna málsins.

Orðrétt sagði Illugi: „Þetta er ömurlegt á öllum sviðum – eins og ég vona að þurfi ekki að útskýra. Skólastjóranum Sigurlaugu Hrund Svavarsdóttur ætti að veita mjög alvarlega áminningu.“

(function(d, s, id) { var js, fjs = d.getElementsByTagName(s)[0]; if (d.getElementById(id)) return; js = d.createElement(s); js.id = id; js.src = „//connect.facebook.net/en_GB/sdk.js#xfbml=1&version=v2.3“; fjs.parentNode.insertBefore(js, fjs);}(document, ‘script’, ‘facebook-jssdk’));