Fyrirtækið er enn starfrækt í dag líkt og fyrir gjaldþrot
Skiptum er lokið í eignarhaldsfélaginu Rekstur 90, sem átti raftækjaverslunina Bræðurnir Ormsson, en ellefu milljónir króna fengust upp í 453 milljón króna gjaldþrot félagsins.
Þetta kemur fram í Lögbirtingablaðinu í dag en félagði var úrskurðað gjaldþrota í september árið 2012 en skiptum úr búinu lauk í lok janúar.
Athygli vakti að nafni Ormsson var breytt í Rekstur 90 ehf, áður en félagið var tekið til gjaldþrotaskipta. Skömmu eftir gjaldþrotið var nýtt félag stofnað undir nafninu Ormsson Verslunarinnar ehf. Það félag var í eigu Stórhyls ehf., sem svo aftur er í eigu Magnúsar J. Magnússonar.
Samkvæmt frétt Viðskiptablaðsins árið 2012 voru eigendur félagsins Bergsala Íslands (áður R2D2 ehf.) og Ormsson ehf. Félögin eru að hluta til í eigu þeirra Andrésar B. Sigurðssonar, framkvæmdastjóra Bræðranna Ormsson, og Einars Þórs Magnússonar, fjármálastjóra.
Fyrirtækið hefur semsagt haldið sínu striki undir nýrri kennitölu frá árinu 2012. En þess má geta að 2,54% fengust upp í almennar kröfur fyrirtækisins.
Fyrirtækið á sér langa sögu, en það hefur starfað undir nokkrum nöfnum síðan 1922 en ávalt selt raftæki og heimilistæki. Það rekur fjórar verslanir á Íslandi; tvær í Reykjavík, þá þriðju í Reykjanesbæ og fjórðu á Akureyri. Á vef fyrirtækisins kemur fram að það hefur meira og minna verið í eigu fjölskyldunnar sem stofnaði það fyrir áttatíu árum.
Í umfjöllun DV um gjaldþrotið árið 2012 kom fram að viðskiptavild var langverðmætasta eign fyrirtækisins þegar það fór í þrot. Viðskiptavildin var í ársreikningnum metin á 298,96 milljónir króna, sem þá var 75 prósent af öllum fastafjármunum félagsins.
Þá vakti einnig athygli að félagið, Rekstur 90, var skráð fyrir íbúð við Flatahraun í Hafnarfirði sem Landsbankinn átti 100 milljóna króna veðrétt á.