„Ég verð að segja að mér finnst þetta alls ekki sú virðing sem Guðni Th á skilið frá þessari þingkonu. Þessi brandari er kannski í lagi í vinahópi, en hann á svo sannarlega ekki við í forsetaveislu á Bessastöðum,“ skrifar Ingólfur Þorleifsson og deilir mynd sem birtist á Vísi. Þar var fjallað um hóp nýrra þingmanna sem mættu í veislu á Bessastaði en Guðni Th. Jóhannesson var gestgjafinn.

Andrés Ingi skrásetti ferðasöguna og birti myndir. Ein mynd hefur þó vakið meiri athygli en aðrar og var birt í frétt á Vísi. Sú mynd sem hefur verið gagnrýnd er af Andrési og forsetanum. Ásta Guðrún Helgadóttir þingmaður Pírata stendur fyrir aftan þau og gerir kanínueyru á forsetanum með fingrunum.

Myndin hefur nú farið á flug á Facebook og er Ásta Guðrún gagnrýnd harðlega og sögð sína embættinu óvirðingu. Þór Jónsson lögmaður og fyrrverandi blaðamaður segir einfaldlega: „Kjánar eru þetta.“

Sveinbjörg Birna deilir skrifum Ingólfs og segir:

„Ef þetta er virðingin fyrir forsetanum, forsetaembættinu og þingmanninum þá þarf ekki bara Guð að blessa Ísland, heldur þjóðin öll að vakna af meðvirknisdraumnum.“

Magnús Þór Hafsteinsson ritstjóri Vesturlands tekur í svipaðan streng og segist vona að myndin sé afskræmd í myndvinnsluforriti.

„Ef ekki þá getum við gleymt brúnhæsnamálinu og snúið okkur að þessu því þessi mynd gæti hæglega farið sína sigurför um heiminn.“

Halldór Halldórsson borgarfulltrúi deilir sömu skrifum og segir:

„Ég er sammála Ingólfi um að þetta er ekki viðeigandi gagnvart þjóðhöfðingja.“

Þá hefur myndinni verið deilt í hinar ýmsu grúppur þar sem hneykslast er á framgöngu þingmannsins. En svo eru aðrir sem telja sprell þingkonunnar ekki alvarlegt. Halldór Högurður rithöfundur og háðfugl segir: „Maður þarf virkilega að kunna vel við einhvern til að lauma á hann kanínueyrum við myndatöku.“

Ekki náðist í Ástu Guðrúnu Helgadóttur.

Uppfært Ásta heldur fram að forsetinn hafi verið með í ráðum.