Lögreglumenn sem framkvæma húsleitir með aðstoð fíkniefnahunda í tengslum við umfangsmikil fíkniefnamál glíma nú við nýja ógn í starfi sínu.
Neysla á fentanýli, rótsterku fíkniefni sem er margfalt sterkara en morfín, hefur aukist mikið í Bandaríkjunum – og víðar – undanfarin misseri. Lyfið er mjög sterkt og getur örlítill skammtur reynst banvænn. Lögreglumenn sem athafna sig í umhverfi þar sem fentanýl er þurfa að klæðast sérstökum búningum og notast við öndunargrímur til að verða ekki fyrir eitrunaráhrifum.
Slíkur lúxus er ekki í boði fyrir sérhæfða fíkniefnaleitarhunda og hafa þegar komið upp tilvik þar sem hundar hafa veikst alvarlega. Í lok október veiktust þrír hundar í Flórída eftir að hafa andað að sér fentanýli í duftformi. Hundarnir náðu sér þó allir, að því er fram kemur í frétt NBC News.