Nýskráningar einkahlutafélaga í september 2016 voru 240. Síðustu 12 mánuði, frá október 2015 til september 2016, hefur nýskráningum einkahlutafélaga fjölgað um 19 prósent í samanburði við 12 mánuði þar á undan. Þetta segir í frétt Hagstofu Íslands.

Alls voru 2.689 ný einkahlutafélög skráð á tímabilinu, borið saman við 2.255 á fyrri 12 mánuðum. Hlutfallsleg fjölgun nýskráninga var mest í flutningum og geymslu, þar sem þeim fjölgaði úr 39 í 65, eða um 67% á síðustu 12 mánuðum.

Meðal annarra greina þar sem nýskráningum hefur fjölgað má nefna leigustarfsemi og ýmsa sérhæfða þjónustu þar sem fjölgunin var úr 169 í 249 nýskráningar (47%), fasteignaviðskipti þar sem nýskráningum fjölgaði úr 318 í 413 (30%) og byggingarstarfsemi og mannvirkjagerð þar sem þeim fjölgaði úr 272 í 353 (30%).