Mannréttindasamtök í Indónesíu og víðar hafa varað við hugsanlegum afleiðingum stjórnarskrárbreytinga sem nú eru til umfjöllunar hjá Hæstarétti landsins. Samkvæmt þeim verður kynlíf utan hjónabands bannað með lögum.

Indónesía er þriðja fjölmennasta lýðræðisríki heims með 260 milljónir íbúa. Meirihluti íbúa Indónesíu eru múslimar og hafa íhaldsmenn í trúmálum lengi barist fyrir breyttri stjórnarskrá í þessa veru. Að því er Washington Post greinir frá er það í höndum Hæstaréttar landsins að taka ákvörðun um þetta og er búist við niðurstöðu á næstu vikum.

Mannréttindasamtök hafa, eins og að framan greinir, varað við hugsanlegum afleiðingum þessara breytinga. Bannið myndi þýða að samkynhneigðir einstaklingar mættu ekki stunda kynlíf þar sem hjónabönd samkynhneigðra eru ekki leyfileg í landinu. Þá eru milljónir einstaklinga í óvígðri sambúð í landinu.

„Það liggur í augum uppi að breyting í þessa veru gæti endað með stórslysi,“ segir Tunggal Pawestri, talskona mannréttindasamtaka sem lýst hafa sig mótfallin breytingunni. Í frétt International Business Times hafa níu dómarar við Hæstarétt landsins þegar lýst yfir stuðningi við breytinguna.

Undanfarnar vikur hefur málið verið til meðferðar fyrir Hæstarétti landsins og hafa fjölmargir sérfræðingar verið kallaðir til, bæði þeir sem eru fylgjandi breytingunni og andvígir henni. Einn þeirra sem kallaður hefur verið til benti á að indónesísku samfélagi stafi ógn af samkynhneigðum. Hann sagði einnig að lögleiðing hjónabanda samkynhneigðra í Bandaríkjunum væri afleiðing samsæris lítils hóps gyðinga.