Könnun MMR þremur dögum fyrir kosningar
Samkvæmt könnun MMR sem fram fór dagana 19. til 26. október mælist Sjálfstæðisflokkurinn stærstur flokka. Fylgi flokksins mælist nú 21,9 prósent nú þegar þrír dagar eru til kosninga. Í könnun sem Fréttablaðið birti í morgun mældist flokkurinn með 25,1 prósents fylgi.
Píratar koma næst á eftir með 19,1% fylgi í könnun MMR og Vinstri-grænir þar á eftir með 16,0% fylgi. Í könnun Fréttablaðsins voru Píratar með 20,3 prósenta fylgi og Vinstri grænir með 16,4 prósenta fylgi.
Framsóknarflokkurinn mælist með 10,0 prósenta fylgi en í síðustu könnun MMR, sem lauk 13. október síðastliðinn, var fylgi flokksins 9,2 prósent. Fylgi Viðreisnar mældist nú 9,3% en mældist 10,2% í síðustu könnun MMR. Fylgi Bjartrar framtíðar mældist nú 8,8%, samanborið við 8,2% í síðustu könnun. Fylgi Samfylkingarinnar mældist 7,6% en mældist 9,0% í síðustu könnun og fylgi Flokks fólksins mældist 3,4%, samanborið við 1,2% í síðustu könnun. Fylgi annarra flokka mældist undir 2%.
Í könnuninni var einnig spurt um stuðning við ríkisstjórnina. Hann mælist nú 33,3 prósent en stuðningur við ríkisstjórnina mældist 34,1 prósent í síðustu könnun.
Svarfjöldi í könnun MMR var 981 og var úrtakið valið handahófskennt úr hópi álitsgjafa MMR. Álitsgjafar MMR eru valdir úr Þjóðskrá þannig að þeir endurspegla lýðfræðilega samsetningu þjóðarinnar á hverjum tíma. Könnunin var sem fyrr segir framkvæmd 19. til 26. október.