„VG er svo töff um þessar mundir að þeim hefur tekist að fá Facebook til að banna sig. Fyrir nekt! Þetta er fyndin og skemmtileg auglýsing,“ segir rithöfundurinn Guðmundur Andri Thorsson um auglýsingu Vinstri grænna.

Þar bregður fyrir nakinni konu með hestshaus maka rauðum lit á vegg. Þá má sjá Ragnar Kjartansson listamann þar sem hann segir að Vinstri græn átti sig á mikilvægi listar og menningu. Ragnar segir:

„Líka djúp ljóð og asnalega skúlptúra. Vertu með og leyfum samfélaginu að blómsta.“

Þá fjallar Frosti Logason annar stjórnandi Harmageddon um myndskeiðið en hann segir:

„Þetta myndband, sem facebook hefur nú fjarlægt af netinu, tekur mig aftur um þónokkur ár til þess tíma þegar hljómsveitirnar Mínus og Kanada fóru saman í mínítúr um Reykjavík undir yfirskriftinni „Gubbaðu ástin mín“. Hugmyndin var auðvitað komin frá Ragnari, sem þá kallaði sig Rassi Prump, og sá hann líka um allar myndskreytingar og listrænt útlit. Sköpunargleði hans og almennilegheit verða seint ofmetin. Heill þér Ragnar Kjartansson.“

Hér fyrir neðan má sjá þessa umdeildu auglýsingu.