Guðmundur slasaðist illa í fyrra – Var í húsi þar sem bíl var ekið inn í forstofu – Sár og reiður vegna málsins
Guðmundur Ingibersson, fatlaður bankastarfsmaður til 30 ára í Reykjanesbæ, gerði í síðustu viku starfslokasamning við Landsbankann. Samningurinn var gerður í samkomulagi við forsvarsmenn bankans en ástæða starfslokanna var „hagræðing og tiltekt í bankanum.“
Guðmundur segir í samtali við DV að hann sé verulega ósáttur með hvernig staðið hafi verið að málinu.
„Þetta kom mér verulega á óvart. Ég átti alls ekki von á þessu. Ég er mjög sár og reiður yfir þessu,“ segir Guðmundur.
Það var Óskar Húnfjörð, mágur Guðmundar, sem vakti fyrst athygli á málinu í grein sem birtist á vef Víkurfrétta í morgun. Þar segir Óskar að Guðmundi hafi verið boðið að samþykkja starfslokasamninginn eða fá sent uppsagnarbréf.
„Auðvitað er hverjum atvinnurekanda í sjálfsvald sett hvenær hann hættir að kaupa þjónustu starfsmanns, en hér greinir okkur á um samfélagslega ábyrgð bankans,“ segir Óskar.
Guðmundur staðfesti við DV að hann hefði fengið þau skilaboð að ef hann myndi ekki samþykkja starfslokasamninginn yrði honum sagt upp. Hann segir að uppsögnin hafi verið vegna „hagræðingar“ að sögn yfirmanna hans og minnst hefði verið á tiltekt í bankanum í starfslokasamningnum.
DV ræddi við Óskar sem segir að málið sé mikið hitamál í Reykjanesbæ en hátt í þúsund manns hafa nú deilt grein hans á Facebook.
„Hann var eini starfsmaðurinn sem var látinn fara og það er alveg ótrúlegt að þeir hafi notað „tiltekt“ sem afsökun,“ segir Óskar í samtali við DV.
Forsaga málsins er sú að Guðmundur lenti í slysi um síðustu páska. Þá var bifreið ekið inn í forstofu heimils móður Guðmundar. Guðmundur var staddur fyrir innan og fékk hann hurð yfir sig. Við það brotnaði hann og skarst illa á hendi.
Guðmundur var frá vinnu í fimm mánuði eftir slysið. Hann snéri aftur til vinnu í september og starfaði í Landsbankanum þar til hann fékk starfslokasamninginn, 18. janúar síðastliðinn. Guðmundur segir að hann hafi strax gengið út og farið heim eftir það.
Guðmundur er 50 ára gamall, kvæntur og hefur fyrir tveimur börnum að sjá. Fötlun Guðmundar er að hann er spastískur og er hann, nú eftir slysið, metinn 75 prósent öryrki. Guðmundur segir að nú taki algjör óvissa við en hann er nú í leit að nýju starfi.
Óskar segist vona að Guðmundi takist að finna nýtt starf sem henti hans starfsgetu.
„Því óþarfi er að kasta á glæ langri starfsreynslu hans með vinalega viðmótinu sem svo margir þekkja. Og nú geta viðskiptavinir bankans gengið inn í hann þess fullvissir að þeir munu ekki mæta neinu „rusli“ í innviðum bankans, því það er jú nýbúið að taka til!“
***Athugasemd frá Landsbankanum:
Á undanförnum árum hefur heimsóknum í útibú fækkað ört því um 80% allra bankaviðskipta eru nú rafræn. Landsbankinn hefur þurft að mæta þessum breyttu aðstæðum með því að fækka starfsmönnum í útibúum út um allt land.
Til dæmis hefur starfsfólki í útibúinu í Reykjanesbæ fækkað úr 52 í 33 á undanförnum fimm árum. Uppsögn starfsmannsins sem um ræðir, er hluti af þessum breytingum. Að öðru leyti getur Landsbankinn ekki tjáð sig um málefni einstakra starfsmanna.
