Óprúttinn aðili reyndi að hafa fé af íslenskri konu sem hann kynntist gegn stefnumótaforritið Tinder. Konan vill ekki koma fram undir fullu nafni en kallar sig Gígí og ræddi við blaðamann Bleikt um málið. Hún varar aðra við slíkum svindlum á samfélagsmiðlum og bendir fólki á að vera vakandi fyrir vísbendingum um slíkt sé að ræða.
Gígí nefnir nokkur atriði sem vöktu grunsemdir hjá henni. Til að mynda óvenju mikil ákefð í samskiptum eftir skamma stund, að segjast vera á ferðalagi og þurfa aðstoð við að komast heim og byrjað að tala um „við/okkur“ fljótlega eftir að spjallið hefst.
Gígí og maðurinn kynntust eins og áður sagði í gegnum Tinder.
Ég sá þennan ægilega myndarlega mann og auðvitað renndi ég honum til hægra enda bara mannleg. Og viti menn það var „match,“
segir Gígí. Hún kastaði á hann kveðju í kjölfarið og spjölluðu þau saman í nokkra daga. Maðurinn kallaði sig Ford og sagðist vera fimmtugur og vera frá Melbourne í Ástralíu en búa á Íslandi.
Ford sagðist hafa komið til Íslands fyrir þremur árum og fallið fyrir landinu og ákveðið að flytja hingað í kjölfarið. Gígí segir að eitt þeirra atriða sem gert hafi það að verkum að hún trúði manninum var að hann sagði búa í Kópavogi en ekki í Reykjavík. Ford tjáði henni að hann starfaði sem verkfræðingur en ræki einnig sitt eigið fyrirtæki hér á landi. Í spjalli þeirra kom fram að hann var að eigin sögn í vinnuferð í Grikklandi, að gera við ferjumótor en kæmi heim síðastliðinn fimmtudag.
Gígí fann á sér að ekki væri allt með felldu í samskiptum þeirra. Hún fékk það á tilfinninguna snemma að hugsanlega væri þetta eitthvað svindl og hafði varan á.
„Ég var búin að spyrja hann einhvern tímann að því hvort þetta væri ekki svindl, þá var hann rosalega reiður,“
segir Gígí og bætir við að viðbrögðin hans við spurningunni hafði ýtt undir frekari grun hennar að flagð væri undir fögru skinni.
„Ef hann hefði ekki verið að reyna að svindla á mér þá hefði honum bara fundist þetta fyndið. Og svo fyllti hann líka út í öll boxin, hann vildi strax ekki tala saman á Tinder heldur færa sig yfir á Whatsapp, hann fór rosalega fljótt að segja hvað ég væri æðisleg og frábær sífellt. „Ég er alveg fallinn fyrir þér,“ sagði hann við mig. Hann eiginlega tikkaði í öll boxin sem ég var búin að lesa um varðandi svona svindl.“
Maðurinn sagði við Gígí að þegar hann kæmi heim til Íslands ætlaði hann að hugsa um hana.
„Ég tók ekki undir hjá honum þegar hann var svona ákafur, fór rólega í þetta, þá sagði hann alltaf „þú hefur ekki trú á okkur.“ Það byrjaði rosalega snemma. Hann var alltaf pínulítið að koma þessu yfir á mig, að ég hefði ekki trú á „okkur.“
Fimmtudagsmorguninn fékk Gígí svo skilaboð frá Ford þar sem hann bað hana um pening. Hann sagðist vera í veseni með töskurnar sínar á flugvellinum og vantaði pening til að geta farið með þær heim. Hann gaf Gígí ítarlega lýsingu á því hvernig þetta hefði atvikast og hvers vegna hann þyrfti aðstoð hennar, til að mynda að hann gæti bara tekið út ákveðna upphæð í hraðbanka sem hann væri nú þegar búinn að gera og það væri búið að loka á kreditkortið hans.
„Þegar ég fékk skilaboðin um morguninn að hann væri á flugvellinum í veseni með töskurnar sínar, þá vissi ég alveg okei jú þetta er svindl. Þetta var alveg rétt hjá mér. Hann sagðist vera staddur á flugvellinum og væri í smá vandræðum. Hann sagðist ekki eiga pening fyrir yfirvigtinni og spurði hvort ég gæti ekki bjargað honum.“
Einnig vakti það upp spurningar hjá Gígí að maðurinn hafði sagst vera í vinnuferð í Grikklandi. Samt sem áður var hann með þrjár stórar ferðatöskur. Sannleikurinn var sá að hann var að reyna að svíkja af henni fé með því að nota töskurnar sem hann sendi henni mynd af. Við frekari eftirgrennslan blaðamanns kom í ljós að þessi mynd er tekin af blogginu triparoundmyworld.com líkt og má sjá á myndunum hér fyrir neðan.
Ford er búinn að eyða Tinder aðgangi sínum og segist Gígí þakka fyrir allt Dr. Phil áhorfið sem hafi gert það að verkum að hún vissi hverju maður á vera vakandi fyrir varðandi svindl af þessu tagi.
Gígí hvetur fólk til að hafa varan á í samskiptum á netinu og vonar að saga hennar getur verið öðrum lærdómsrík.
