,,Þetta var frábært og einstaklega skemmtileg upplifun. Við þurtfum að hafa talsvert fyrir þessu, hlupum nánast á eftir honum en þetta hafðist allt saman að lokum,“ sagði Vilborg Halldórsdóttir er hún landaði maríulaxinum á Brotinu í Norðurá í morgun.

Veiðin í Norðurá hófst snemma í morgun en þau hjónin Helgi Björnsson, söngvari, og konan hans Vilborg Halldórsdóttir opnuðu ána með formlegum hætti eins og sagt er. Veiðin fór rólega af stað en upp úr níu fóru hlutirnir að gerast og fljótlega voru komnir fimm laxar á land. Það verður spennandi að sjá hvernig veiðin þróast í Norðurá en byrjunin gefur góð fyrirheit.

Þó nokkur fjöldi fólks fylgdist með þegar veiðin hófst í morgun og óhætt að segja að spenna hafi verið í loftinu. Opnun Norðurár markar ákveðin tímamót en þarna má segja að veiðin hefjist fyrir alvöru ár hvert. Margir bíða spenntir eftir veiðisumrinu en margar ár opna hver af annarri á næstu dögum.

Á myndinni er Vilborg Halldórsdóttir með maríulaxinn sinn og henni til aðstoðar er Þorsteinn Stefánsson.