Samkvæmt opinberum gögnum þá lést barnaníðingurinn Jeffrey Epstein i fangaklefa sínum 2019. Er hann sagður hafa tekið eigið líf. En réttargeðlæknirinn Leslie Dobson segir að í hinum umtöluðu Epstein-skjölum séu atriði sem veki upp alvarlegar spurningar um andlát Epstein.

Bandaríska dómsmálaráðuneytið hefur opinberað milljónir skjala tengdum Epstein. Dobson segir að mörgum spurningum sé ósvarað í skjölunum.

Kjarninn í fullyrðingu hennar snýst um upptökur úr eftirlitsmyndavélum nóttina sem Epstein fannst látinn. Hún segir að það vanti 23 sekúndur í upptökurnar.

„Já, ég held að hann sé á lífi,“ sagði hún í hlaðvarpi og vísaði þar til að í skjölunum kemur fram að lýtalæknir hafi oft komið heim til Epstein á árunum áður en hann er sagður hafa látist.

Dobson sagðist vera að vinna með skjölin í samvinnu við þingmenn. Hún sagði að líklega hafi hluti skjalanna verið ritskoðaður of mikið og að hluti þeirra hafi ekki verið birtur.

Ekkert hefur komið fram sem sannar að Epstein sé á lífi.