Maðurinn hugðist stela bílnum en hafði ekki erindi sem erfiði. Hann opnaði þó skottið í leit að einhverjum verðmætum, en var illa brugðið þegar hann kom auga á nokkuð stóra pakkningu sem virtist innihalda kókaín.
Þjófurinn hafði samband við lögreglu þar sem hann lýsti því að hann hefði fundið pakkningu með kókaíni í vegkanti. Þegar hann var spurður frekar viðurkenndi hann að hafa fundið fíkniefnin í skotti bifreiðar sem hann hugðist stela.
Lögregla rakti bifreiðina til eiganda hennar, Edwards Gillespie, 62 ára íbúa á Nantucket, og fékk heimild til að fylgjast með bílnum. Þann 8. janúar náðu eftirlitsmyndavélar því þegar Gillespie opnaði skottið ítrekað, athugaði hólfið fyrir varadekk þar sem fíkniefnin höfðu verið geymd, gekk um órólegur á meðan hann talaði í síma og reif síðan í sundur dekkjahólfið.
Í kjölfarið var Gillespie handtekinn og ákærður fyrir stórfellt fíkniefnasmygl, meðal annars fyrir vörslu á meira en 200 grömmum af kókaíni í þeim tilgangi að dreifa. Hann hefur neitað sök og segir að hann hafi ekki vitað af fíkniefnum í bílnum.
Við húsleit á heimili Gillespie, með aðstoð bandarísku strandgæslunnar og fíkniefnalögreglunnar, DEA, fundu lögreglumenn frekari fíkniefni og reiðufé. Þar á meðal voru um 1,1 kíló af kókaíni, tæp 70 grömm af amfetamíntöflum og um 10.000 Bandaríkjadalir í reiðufé.
Maðurinn sem greindi lögreglu frá fíkniefnunum hefur ekki verið nafngreindur og óljóst er hvort hann muni sæta ákæru vegna tilraunarinnar til bílaþjófnaðar.
